Tadqiqotlar markazi tomonidan “O‘zbekistonda aksiyadorlar umumiy yig‘ilishi kvorumini aniqlash mexanizmini takomillashtirish” mavzusidagi tahliliy ma’ruza tayyorlandi. Mazkur hujjatda aksiyadorlari soni ko‘p bo‘lgan aksiyadorlik jamiyatlarida kvorum mavjud bo‘lmasligi bilan bog‘liq muammolarni hal etish hamda korporativ boshqaruv sohasidagi qonunchilikni takomillashtirish bo‘yicha takliflar ilgari surilgan.

Mirzo Ulug‘bek nomidagi O‘zbekiston Milliy universiteti Iqtisodiyot fakultetida “Iqtisodiy landshaft: bilim, tajriba va mahorat” mavzusidagi ilmiy-amaliy seminarlar turkumi davom etmoqda.

Xususiylashtirish va davlat aktivlarini boshqarish muammolarini tadqiq etish markazining “2030-yilgacha O‘zbekistonda davlat aktivlarini boshqarishning konseptual yo‘nalishlari to‘g‘risida”gi doklad Davlat aktivlarini boshqarish agentligi tomonidan Hukumat qarori loyihasini tayyorlash jarayonida foydalanildi.

2026-yil 26-may kuni Xususiylashtirish va davlat aktivlarini boshqarish muammolarini tadqiq etish Markazi xodimlarining ilmiy, uslubiy hamda ekspert-tahliliy faoliyati natijalarining amaliyotga joriy etilgani toʻgʻrisidagi navbatdagi maʼlumotnoma olindi.

Mazkur maʼlumotnomada Tadqiqot markazi tomonidan ishlab chiqilgan takliflar Davlat aktivlarini boshqarish agentligi faoliyatining keng doiradagi yoʻnalishlarini qamrab olgani hamda quyidagi sohalarga oid qonunlar va qonunosti normativ-huquqiy hujjatlar loyihalarining normalarini shakllantirishda foydalanilgani tasdiqlangan:

* xoʻjalik jamiyatlarini davlat tomonidan tartibga solish; * xoʻjalik jamiyatlarini xususiylashtirishda tarmoq yondashuvi; * davlat ulushlarini boshqarish samaradorligini baholash; * korporativ boshqaruvni takomillashtirish; * shuʼba korxonalar faoliyatini tartibga solish.

Tadqiqot markazi ishlanmalari amaliyotga joriy etilishi davlat aktivlarini boshqarish samaradorligini oshirishga hamda xususiylashtirilayotgan obyektlarning investitsiyaviy jozibadorligini yaxshilashga xizmat qiladi.

2026-yil 26-may kuni O‘zbekiston Respublikasi Oliy sudida mas’ul vazirlik va idoralar ishtirokida to‘lovga qobiliyatsizlik sohasidagi dolzarb muammolar va ularni hal etish yo‘llarini muhokama qilishga bag‘ishlangan davra suhbati bo‘lib o‘tdi.

Joriy etilgan natijalar to‘lovga qobiliyatsizlik institutini takomillashtirish, sud boshqaruvi, rieltorlik faoliyati va baholash faoliyati sohalarida normativ hamda metodik hujjatlarni ishlab chiqish yo‘nalishlarini qamrab oladi.

Xususan, quyidagi yo‘nalishlar bo‘yicha takliflar va ishlanmalar amaliyotga joriy etilganligi tasdiqlandi:

O‘zbekiston Respublikasida to‘lovga qobiliyatsizlik institutini takomillashtirish;

O‘zbekiston Respublikasining “To‘lovga qobiliyatsizlik to‘g‘risida”gi Qonuniga sharhlar tayyorlash;

O‘zbekiston Respublikasining to‘lovga qobiliyatsizlik indeksini yaxshilash bo‘yicha takliflar ishlab chiqish;

sud boshqaruvchilarining kasbiy etika Qoidalari loyihasini ishlab chiqish;

“Ko‘chmas mulk obyektlarini ishonchli boshqarish” Milliy rieltorlik xizmatlari standartini ishlab chiqish;

transport vositalari qiymatini baholash Milliy standartini ishlab chiqish;

madaniy boyliklar qiymatini baholash Milliy standartini ishlab chiqish.

Olingan ma’lumotnomalar Markaz tomonidan olib borilayotgan tadqiqotlarning amaliy ahamiyatini, shuningdek, ularning davlat aktivlarini boshqarish, baholash, rieltorlik faoliyati va to‘lovga qobiliyatsizlik tartib-taomillari sohalarida normativ, metodik va tashkiliy yechimlarni tayyorlashdagi dolzarbligi hamda talabga ega ekanligini tasdiqlaydi.

Mazkur natijalar Markaz tomonidan islohotlarni ilmiy-tahliliy jihatdan qo‘llab-quvvatlash hamda tadqiqot natijalarini ixtisoslashgan tashkilotlar va davlat organlarining amaliy faoliyatiga joriy etish borasida izchil ishlar olib borilayotganidan dalolat beradi.

2026-yil 12-may kuni Xususiylashtirish va davlat aktivlarini boshqarish muammolarini tadqiq etish markazi O‘zbekiston Respublikasi Davlat aktivlarini boshqarish agentligi bilan hamkorlikda “O‘zbekiston Respublikasida madaniy boyliklar qiymatini baholash standartini joriy etishning dolzarb masalalari” mavzusida ilmiy-amaliy onlayn konferensiya tashkil etdi.

Tadbir madaniy boyliklar qiymatini baholash standartini joriy etish, uning art-bozorni rivojlantirish, madaniy merosni asrab-avaylash, professional ekspertlar hamjamiyatini shakllantirish, shuningdek badiiy, tarixiy va madaniy qiymatga ega obyektlarni baholash bo‘yicha ilmiy-metodik yondashuvlarni takomillashtirishdagi ahamiyatini muhokama qilishga bag‘ishlandi.

Konferensiyani kirish so‘zi bilan O‘zbekiston Respublikasi Davlat aktivlarini boshqarish agentligi huzuridagi Xususiylashtirish va davlat aktivlarini boshqarish muammolarini tadqiq etish markazi direktori, iqtisodiyot fanlari doktori, professor Butikov Igor Leonidovich ochib berdi.

Konferensiya davomida asosiy ma’ruza bilan O‘zbekistondagi ilk san’at buyumlari auksion uyi — “ART VERNISSAGE” direktori, madaniy boyliklar qiymatini baholash standartining tashabbuskori va hammualliflaridan biri Sultonov Shavkat Fazilovich ishtirok etdi. U o‘z ma’ruzasida mazkur standartni qabul qilish art-bozorni shakllantirish, san’at buyumlari bilan bog‘liq bitimlarning shaffofligini oshirish, madaniy boyliklarni professional baholashni rivojlantirish hamda O‘zbekistonning madaniy merosini asrab-avaylashda muhim ahamiyatga ega ekanligini ta’kidladi.

Shuningdek, konferensiyada falsafa fanlari nomzodi, O‘zbekiston Badiiy akademiyasi Rassomlar ijodiy uyushmasi san’atshunoslar seksiyasi raisi Ahmedova Ilmira Rahimovna ma’ruza bilan ishtirok etdi. U o‘z chiqishida madaniy boyliklar qiymatini baholash standartining O‘zbekiston Respublikasida san’atshunoslarning professional sinfini shakllantirishdagi rolini ochib berdi. Shuningdek, Kamoliddin Behzod nomidagi Milliy rassomlik va dizayn instituti dotsenti, san’atshunoslik bo‘yicha falsafa doktori (PhD) Shahlo Abdullaeva ham ma’ruza qildi.

Ekspert muhokamasi doirasida quyidagilar ishtirok etdi:

Hakimov Akbar Abdullayevich — O‘zbekiston Respublikasi Fanlar akademiyasi akademigi, O‘zbekiston Badiiy akademiyasi akademigi, professor, san’atshunoslik fanlari doktori, Tokiodagi Soka universitetining faxriy doktori, madaniy boyliklarni baholash metodikasini ishlab chiqish bo‘yicha guruh hammuallifi va rahbari;

Abdullayev Masharib Saydamatovich — O‘zbekiston Fanlar akademiyasi San’atshunoslik instituti direktorining ilmiy ishlar bo‘yicha o‘rinbosari, san’atshunoslik fanlari doktori;

Rahimov Komiljon Rahmatovich — O‘zbekiston Fanlar akademiyasi Sharqshunoslik instituti yetakchi ilmiy xodimi, tarix fanlari doktori, professor, sharqshunos, manbashunos;

Paxomenko Oksana Vyacheslavna — iqtisodiyot fanlari nomzodi, O‘zbekiston baholovchi tashkilotlar assotsiatsiyasi raisi o‘rinbosari, ekspert, oliy toifali baholovchi.

Konferensiya ishtirokchilari tomonidan standartni amaliyotda qo‘llash masalalari, madaniy boyliklar qiymatini aniqlashning metodik yondashuvlari, malakali mutaxassislarni tayyorlash zarurati, shuningdek baholovchilar, san’atshunoslar, tarixchilar, manbashunoslar va art-bozor vakillari o‘rtasidagi hamkorlikning ahamiyati muhokama qilindi.

Madaniy boyliklar qiymatini baholash standartini joriy etish art-bozorga bo‘lgan ishonchni oshirish, san’at buyumlari bilan bog‘liq bitimlarning shaffofligini ta’minlash, mulkdorlar va xaridorlar manfaatlarini himoya qilish, shuningdek O‘zbekiston Respublikasining madaniy merosini asrab-avaylashda muhim vosita bo‘lib xizmat qilishi mumkinligiga alohida e’tibor qaratildi.

Konferensiya yakunida ishtirokchilar tomonidan metodik yondashuvlarni yanada takomillashtirish, ekspertlik amaliyotini rivojlantirish, ilmiy, professional va madaniy tashkilotlar o‘rtasidagi hamkorlikni mustahkamlash, shuningdek madaniy boyliklarni baholash sohasida professional mutaxassislar hamjamiyatini shakllantirish uchun zarur sharoitlarni yaratish bo‘yicha takliflar bildirildi.

Tadbir yakunida madaniy boyliklar qiymatini baholash standartini qabul qilish va joriy etish milliy art-bozorni rivojlantirish, ekspert baholash sifatini oshirish hamda O‘zbekistonning boy madaniy merosini asrab-avaylashga qaratilgan dolzarb va o‘z vaqtida amalga oshirilayotgan muhim qadam ekani ta’kidlandi.

2026-yil 8-may kuni Tadqiqotlar markazining 2026-yilga mo‘ljallangan ish rejasiga muvofiq, Ilmiy laboratoriya faoliyati doirasida navbatdagi ilmiy seminar tashkil etildi va o‘tkazildi.

Seminarda baholash va rieltorlik faoliyatini tartibga solishning ilmiy-metodologik asoslarini rivojlantirish bo‘limi mudiri, iqtisodiyot fanlari nomzodi, katta ilmiy xodim Kravchenko Aleksandr Nikolayevich “Tabiiy resurslar qiymatini baholash milliy standartining asosiy qoidalari” mavzusida hamda korporativ boshqaruv muammolarini va obligatsiyalar hamda aksiyalar chiqarish hisobiga investitsiyalarni jalb etish masalalarini tadqiq etish bo‘limi mudiri, iqtisodiyot fanlari doktori, professor Tashmatov Rustam Xusanovich “Kuzatuv kengashi a’zolari, direktorlar, boshqaruv a’zolari va ishonchli boshqaruvchilar tomonidan fidutsiar majburiyatlarga rioya etish bo‘yicha metodik tavsiyalar” mavzusida tahliliy ma’ruzalar bilan ishtirok etdilar.