Yig‘ilish davomida Markaz xodimlari tomonidan davlat va munitsipal aktivlarni boshqarish samaradorligini oshirish hamda baholash faoliyatining metodologik ta’minotini takomillashtirishga bag‘ishlangan ilmiy-tadqiqot ishlari natijalari taqdim etildi va muhokama qilindi.

Davlat aktivlarini boshqarish muammolarini tadqiq etish bo‘limining kichik ilmiy xodimi Usmonov Behruz Shovkat o‘g‘li “O‘zbekiston Respublikasi ma’muriy-hududiy birliklarida munitsipal mulkni boshqarish va tasarruf etish to‘g‘risidagi nizomni ishlab chiqish hamda tasdiqlash bo‘yicha uslubiy tavsiyalar” mavzusida ma’ruza qildi. Taqdimot davomida munitsipal mulkni boshqarish va tasarruf etishni tartibga soluvchi mahalliy normativ hujjatlarni ishlab chiqishning uslubiy yondashuvlari, shuningdek, mazkur faoliyatni O‘zbekiston Respublikasi ma’muriy-hududiy birliklarida yagona yondashuv asosida tashkil etish bo‘yicha takliflar ko‘rib chiqildi.

Baholash va rieltorlik faoliyatini tartibga solishning ilmiy-metodologik asoslarini rivojlantirish bo‘limining katta ilmiy xodimi M.Yu. Qarayev “Milliy baholash standarti (MBS №18) ‘Tabiiy resurslar qiymatini baholash’ metodikasi” mavzusida ma’ruza bilan ishtirok etdi. Ma’ruzachi ishlab chiqilgan metodikaning asosiy qoidalarini bayon qildi, Milliy baholash standarti talablariga muvofiq tabiiy resurslar qiymatini aniqlashning o‘ziga xos jihatlarini yoritdi hamda uni baholash faoliyatida amaliy qo‘llash masalalariga to‘xtaldi.

Ilmiy laboratoriya yig‘ilishi yakunlari bo‘yicha ishtirokchilar taqdim etilgan ilmiy ishlanmalarning dolzarbligi va amaliy ahamiyatini alohida ta’kidladilar. Muhokamalar davomida bildirilgan taklif va tavsiyalar metodik hujjatlarni yanada takomillashtirish, ilmiy-tahliliy materiallarni tayyorlash hamda O‘zbekiston Respublikasida davlat va munitsipal aktivlarni boshqarish samaradorligini oshirishga qaratilgan takliflarni ishlab chiqishda inobatga olinadi.